بلوگ التخرج. تحدي ال29 يوم

 "جانت اكثر 29 يوم غنية بالإنجازات بحياتي"

أقوى تحدي هو تحدي الذات وتحدي الظروف وتحدي الكسل الي موجود بداخل كل واحد مننا. 

ماكو احد ميحب الراحة الراحة حلوة لكن من تطور نفسك وتتعلم شيء جديد النتيجة راح تكون احلى بهواي من الراحة.

 

اني رحيم دهري ،عمري 25 واشتغل مدرس لغة انكليزية. عندي شهادة بكالوريوس بالغة الإنكليزية واحب اختصاصي.

لكن هوايتي الأولى هي التصميم والبرمجة َوكل الأعمال الي تتعلق بالحاسوب.

قبل سنة من الان دخلت دورة حورية لتعلم الفوتوشوب وجانت دورة إبتدائية فادتني هواي بس انقطعت عن التصميم وره نهاية الدورة بمدة قليلة واخذتني مشاغل الحياة بعيد عن التصميم

تابعت حساب مرتضى التميمي "صاحب المبادرة مال التحدي" وكلش عجبني محتواه.. اتذكر زميلي بالجامعة علي رضا هو الي نشر حسابه.

بمجرد شفت كلمة تحدي قررت أشارك وقررت اسوي التحدي سبب حتى ارجع للتصميم واطور نفسي بيه.. خلال 29 يوم حققت نتائج مبهرة واني كلش معجب بهذا التقدم الي حققته. مصر انه استمر اتحدى نفسي حتى لو خلصن ال29 يوم. لانه انزرع بداخلي تحدي الذات من أجل هدف راسمه ببالي. 

كتغيير شوية عن التصميم 

دخلت دورة برمجة واتعلمت ابرمج موقع إلكتروني وبديت كلشش من الصفر اتعلمت لغة الhtml ولغة ال css وحاليا راح ابدي بلغة ال php وان شاء الله مستمر بهالمجال لان حبيت البرمجة. 

انتقلت لدورة مصغرة لبرنامج اكسل واتعلمت شغلات كلش مفيدة بهذا البرنامج كذلك احترقت التصميم بالوورد والبوربوينت 

راح اشارك وياكم بعض الصور من أعمالي بالتصميم. 

صممت غلاف ملزمة اليه وصممت اعلانات لبعض المولات والدورات وكذلك شهادة تقديرية للطلاب الي نجحو عندي بالدور الأول هاي السنة.

رسالتي الكم انه حاولو تتحدون نفسكم 

حتى لو كنت تحب عملك اكو ظروف هواي راح تحاول تمنعك لتخلي أعذار ولا تتحجج اصلا.. حاسبتي الي سويت ليها كل هاي الانجازات بافقر الامكانيات الموجودة بس اعتبرت هالشي جزء من التحدي وكملت .

فعلا جانت اكثر 29 يوم غنيه بالإنجازات بحياتي.